काठमाडौँ – अमेरिकाको विवादित भ्रमणपछि बेलायत पुगेका युक्रेनी राष्ट्रपति भोलोडिमिर जेलन्स्कीले प्रधानमन्त्री केयर स्टारमरसँग भेटघाट गरेका छन्। यस अवसरमा जेलन्स्कीले स्टारमरको अटल समर्थनको लागि धन्यवाद व्यक्त गर्दा स्टारमरले बेलायतको युक्रेनको सार्वभौमसत्ता र सुरक्षाप्रतिको प्रतिबद्धता दोहोर्याए। यो भेट अमेरिकी राष्ट्रपति डोनाल्ड ट्रम्पसँगको बहसको एक दिन पछि भएको हो।
बैठकमा युक्रेन र युरोपले सामना गरिरहेका चुनौतीहरू, अन्तर्राष्ट्रिय सहयोग र बलियो सुरक्षा ग्यारेन्टीसहित न्यायपूर्ण शान्ति सुनिश्चित गर्ने प्रयासबारे छलफल गरिएको छ। भेटपछि जेलन्स्कीले इन्स्टाग्राममा सेयर गरेको पोस्टमा, “प्रधानमन्त्री केयर स्टारमरसँग फलदायी र न्यानो भेटघाट भयो; हामीले चुनौतीहरू, सहयोग र न्यायपूर्ण शान्तितर्फका कदमहरूबारे छलफल गर्यौं,” भनेका छन्।
बैठकको क्रममा, युक्रेन र बेलायतले युक्रेनको रक्षा क्षमताबृद्धिका लागि ऋण सम्झौतामा हस्ताक्षर गरेका छन्। बेलायतले युक्रेनलाई २.८ बिलियन डलर ऋण सहयोग गर्नेछ, जुन हालै गरिरहेको वार्षिक ३.७ बिलियन डलरभन्दा अतिरिक्त हो। यी ऋणका रकम बेलायतले रोक्का गरिएको रुसी सम्पत्तिको आम्दानीबाट भुक्तानी गर्ने व्यवस्था गरिएको छ।
जेलन्स्कीले “आज युक्रेन र संयुक्त अधिराज्यले ऋण सम्झौतामा हस्ताक्षर गरे; यो ऋणले युक्रेनको रक्षा क्षमतालाई बलियो बनाउनेछ र रूसी सम्पत्तिबाट प्राप्त हुने राजस्वले भुक्तानी हुनेछ। युद्ध सुरु गर्नेले मूल्य चुकाउनै पर्छ,” भन्दै आफ्नो विचार प्रकट गरे।
भेटपछि स्टारमरले पनि इन्स्टाग्राममा पोस्ट गर्दै, “युक्रेनमा चलिरहेको युद्धमा रुस विरुद्ध बेलायतको दृढ अडान र मेरो अटल समर्थन दोहोर्याउनु सम्मानको कुरा हो,” भनेका छन्। स्टारमरले भिडियोमा जेलन्स्कीलाई अँगालो हाल्दै लेखेका छन्, “बेलायत आज र सधैं युक्रेनको साथमा उभिन्छ; म रुसको अवैध युद्ध अन्त्य गरी युक्रेनको सार्वभौमसत्ता र सुरक्षाको सुनिश्चित शान्ति सुनिश्चित गर्न कटिबद्ध छु।”
यो भेट युरोपेली नेताहरूको शिखर सम्मेलन अघि भएको हो, जहाँ युक्रेनमा “न्यायपूर्ण र दिगो शान्ति सुनिश्चित गर्न” समर्थन बढाउने र युरोपको रक्षा सहयोग सुदृढ गर्ने विषयमा छलफल हुने अपेक्षा गरिएको छ।
Leave a Comment