काठमाडौँमा जारी साफ यू-२० च्याम्पियनसिप अन्तर्गत समूह एबाट नेपाल र बंगलादेश सेमिफाइनलमा प्रवेश गरेका छन्।
समूह ए अन्तर्गत मंगलबार सम्पन्न खेलमा बंगलादेशले श्रीलंकालाई २-० ले पराजित गरेसँगै नेपाल र बंगलादेश सेमिफाइनलमा पुगेका हुन्। समूह ए का दुवै खेलमा हार बेहोरेको श्रीलंका भने प्रतियोगिताबाट बाहिरिएको छ।आइतबारदेखि शुरु भएको प्रतियोगितामा समूह ए मा रहेका नेपालले पहिलो खेलमा श्रीलंकालाई १-० गोल अन्तरले हराउँदै विजयी सुरुवात गरेको थियो भने सोमबार समूह बी को खेलमा भारतले भुटानलाई १-० गोलले पराजित गरेको थियो।
समूह ए मा पहिलो खेलमा नेपालसँग पराजित भएको श्रीलंकालाई सेमिफाइनलमा पुग्नका लागि यो खेल जित्नै पर्ने अवस्थामा थियो भने बंगलादेशले आफ्नो पहिलो खेल खेलेको थियो।नेपालसमेत ६ देशले भाग लिएको यस प्रतियोगितामा नेपाल समूह ए मा बंगलादेश र श्रीलंकासँग रहेको छ भने समूह बी मा भारत, भुटान, र माल्दिभ्स रहेका छन्।
त्यसैगरी, नेपालले समूह चरणको अर्को खेल बिहीबार बंगलादेशसँग खेल्ने तालिका रहेको छ।
